Gen 2 | MPX | STEP | Inoke Yabowaine labulabum ge panayawi ginebi ge buguliliyau gegewel i ginolil habal.

Genesis 2

1 Inoke Yabowaine labulabum ge panayawi ginebi ge buguliliyau gegewel i ginolil habal. 2 ^{a
,} ^bHe mulaa abwe lan sebenina Yabowaine tuwalali gegewena i ginolil iyaka i pwamowasi, inoke lan sebenina elana i veyahoem wana tuwalali elana. 3 Inoke lan sebenina i ba muloluan ge i teli i bwabwalena, kaiwena lan o elana i veyahoem wana tuwalali gegewena elal bolo iyaka i ginolil.

Gamagalau Houhouwel Liwaniliya

(2:4—4:26)

Ideni Eyowana

4 Yehoba labulabum ge panayawi i ginolil i mowasi, yaka liwanina i ola hiwe.

Sauga Yehoba Yabowaine labulabum ge panayawi i ginolil, inoke gamagal al i ginol. 5 Houwan ga nige ebwakil etega o ebo mwawin etega i sisiun bilibiliya, ebo uleya, ebo eyowaa, kaiwena Yehoba Yabowaine nigeya ga kehe i papatuna bilibili i papahun, ge nige gamagal i gagan tage bilibili ni eyowa-an. 6 He gogau i heem bilibiliya yaka tutulina bilibili pwatana gegewena i pahunhun. 7 ^cYehoba Yabowaine bilibili i ahe gamagal i ginoliya, yaka yawal yawalina gaganina i yana papanetan buhunaa, inoke gamagal yawalina i gan.

8 He Yehoba Yabowaine eyowa ^{▼▼2:8Ta ba “eyowa,” yaa ana nuwatu i ola labi bwabwatana etega ebwakil ge bugul siusiunil ali awa waiwaisal ge bolo aanan kaiwena hi gewi hi minaa.} iyaka i ginol labi balimana, labena Ideni elana, inoke tau toto i ginol i teliya eyowa o elana. 9 ^eYehoba Yabowaine ebwakil tomaha ge tomaha ali awa waiwaisal ge enowaliya waiwaisana aanan kaiwena i pasiuniliya to. Eyowa nuwanaa ebwakil labui hi siunaa, yawal ana ebwakil ge aatena gegewena waiwaisana ge nanakina ana ebwakil.

10 Wewel etega i sani solaa labena Ideni gamwanaa eyowa i pahunhun. Yaka abwe i wali lalana esopali hi tabwa wewel unuliya. 11 Wewel houwan alana Pison, iya i sani solaa labi Havila gamwanaa. (He labi o elana gold i minaa, 12 goldina i waisi hot. I ola al ebwakil etega suina hi aahe bugul bwalena waiwaisana hi ginoliya ge pat ali awa waiwaisal hi gan al to.) 13 Wewel eluwana alana Gihon, iya i sani solaa labi Kus gamwanaa. 14 Wewel etonina alana Taigilis, iya i sani olak panuwa Asul labena balimana, ge wewel esopalena alana Yupeleitis.

15 Yehoba Yabowaine tau i ahe i teliya Ideni eyowana elana, inoke ni tuwalali-an ge ni matahikan. 16 Yaka Yehoba Yabowaine i baek tau elana i ba, “I bosowaina te ebwakil gegewel eyowa gamwanaa enowaliya nu anan ya; 17 yaa aatena gegewena waiwaisana ge nanakina ana ebwakil enowana bahi nu aan, kaiwena sauga toto ebo nu an, he nasi nu aliga.”

18 Inoke Yehoba Yabowaine i ba, “Nige i wawaisi te tau maisena ya ni mimwaumwau. Ana tolaba etega na ginol iya alona.”

19 He Yehoba Yabowaine iyaka bilibili i ahe bwasumu gegewel i ginoliliya, bolo hi nawanawa bilibili pwatanaa ge bolo hi youyou hawawala. Inoke i enil pwatanik tau elana ge ni kite tau alaliya ga ni tun ola. Inoke tau bwasumu bolo totounuwal, bolo hi youyou hawawala ge bolo bekikil gegewel alaliya i tun. Bugul gegewel alaliya ga i tun ola, he alaliya i ola to. Yaa Adama ^{▼▼2:19-20Pana Hibilu elana alan “Adama” ana sapu te “tau.”} nige ana tolaba etega i pwapwawa ge alona.

21 Inoke Yehoba Yabowaine tau i pakenu mati. Sauga i kenukenu, inoke luluna tutuwana etega i ahe, yaka tuwana i kaus pasikal. 22 Yehoba Yabowaine tau luluna tutuwana i ahe yova i ginoliya, yaka i pwatanik tau elana.

23 Sauga tau yova i kite, yaka i ba, “He abwe o hulhula hot. Tutuwana i neem tutuwau elana ge bunumwina i neem bunumwiu elana. Inoke alana na tun ‘yova’ ^{▼▼2:23Pana Hibilu elana vilan “yova” kelaubwa ni olaolaek te vilan “tau” elana.} kaiwena i masalem tau tuwana elana. 24 ^hHeiya te kaiwena tau tamana ge hinana ni miluwagil ni na alona ge lagona nihi mipamaisena, inoke ali toto labui nihi ola tuwan maisena.

25 He Adama ge lagona hi bokaboka, yaa nige hi pupuluwawi.